MISSION

MISSION TRIP IN CZECH REBUPLIC

 

rwsf7706.jpg

Hello! Tutan ka blogg ah share kan duh mihna cu Mission trip, Czech Republic kan kal nak kong a si. Zeidah kan kal hnawhchanh mi asi, cun Czech Republic Klasterec khua ah sianginn tang 5 in tang 9 sianghngakchia kan lennak kong chung in ka hmuhtawn mi le bia kan i ruahnak chung in tu lio laimi a thang lio mi kan nau le tampi nih an ton ve mi harnak le chambau nak kong a si. Lungsau tein nan ka rel piak nak lai kan sawm hna…

Kumkhat ah voithum hi kan sianginn in khual tlawn nak kan ngei. Avoikhatnak kan khualtlawnnak cu Student mission trip ti a si i, ramleng ah a si. Student mission trip ah hin ram 7 chungah ramkhat, kan kal duhnak i thim khawh a si i cucu Norway Lyngdal, Norway Hamar, Estonia, Latvia, Slovakia, Czech cun Belgium an si. Kan sianginn ah hin minung 100 deng mang kan si i 100 chung ah hin avan tha mi nih apakhatnak aa thimmi ram ngah a si. Tukum hi ka vanchia ka ti lai maw, ka thim lo nak ram Czech ka ngah i, Czech ah ka kal. Kan i thawh lai tiang hin ka ngeih lo tuk, kal lo khi ka lung a chuak, nain ti awk atha lo.  Mariager in zinglei suimilam 7:15 in kan hawile Slovakia le Belgium a kal mi he Bus kan i cit ti hna i Germany (Flensborg) ah bus kan i thleng. Flensborg in kan i then hna i, slovakia a kal mi nih slovakia lei an kal, Belgium a kal mi nih Belgium lei an kal. Czech a kal mi nih Czech lei kan kal.  Minung 15 kan si Czech lei a kal mi hi. Zaan nazi 10:00 ah Czech Rebuplic klasterec nad ohri, kan umnak hmun kan phan.

CZECH REBUPLIC

Czech Rebuplic hi Europa ram ah a um mi a si. Biaknak lei ti a si ah cun vawleicung ah biaknak a ngei lo mi ram lak ah top ah a tel ve mi a si. An ram hi 84 percent atheistic an si i Khrihfa biaknak hi 0,8 percent an si. Kan kal nak hmun a min hi anmah Czech holh in cun klasterec nad ohri ti asi i minung 14,822 hrawng minung an um. An ram hi khrihfa an tlawm pin ah evengelist le mission rian tuan mi zong an tlawm, cu caah Jesus kong a thei lo mi zong an um len. Cu ruang ah kan mission trip ah hin sianginn ah Khrihfa biaknak kong chimh kan ngah lo. Cun kan chawnhbiak hna tik ah zei bia dah kan chim lai i zei kong dah bia kan ruah hna timi i ralring tak ahau.

Mission kan kal hnawhchan mi 

46170066_1986818314765259_6814087566405402624_n.jpg46238288_968578216676370_1231473763506192384_n46181006_361455927946629_7779733915492679680_n

Tutan mission trip kan kal hnawhchanh mi cu Klasterec nad ohri khua ah biakinn pakhat kan va tlawng. An Khrihfabu an dirhnak in a sau rih lo, pin ah minung aa pummi hi 50 hrawng lawng an si. Cucu rian va bawmh dingin le mino, i hawikomhnak ah vaa tel ve, cun relationship le fellowship tha tein an ngeih khawhnak caah rian kan va tuan. Cun sianginn ah sianghngakchia tang 5 in tang 9 tiang mirang holh kan va chimh hna.  Mission rian hi a phunphun in tuan khawh a si bangtuk in kan nih zong mirang holh a thiam lo mi hna kha mirang holh an holh khawh deuh nak ding ah ca kan va chimh hna. kan kal hnawhchanh bikmi cu zeitindah mino hna nih Pathian dawtnak an hngalhkhawh ve lai, sianginn an kai nak ah zeitluk in dah mah le mah i dawt hmasa a herh, cun zeitluk in dah mah le mah i cohlang a bia pi ti mi zong kha kan chimh chih hna.

46180211_2167747710113834_3535616451001974784_n46319901_729478240768109_4518086783988137984_n46224851_560189134406644_8606537728680525824_n

Kan ton michung in tu lio mino kan tuarnak

Tulio mino kan sining ah hin sianginn kan kai nak ah siseh, pumpak nifatin kan tlawn lennak cio zong ah hin mah le mah i dawt hmasa lo le, mah le mah i cohlan lo, mah le mah i zahpi nak hi a tam tuk. Thil kan i hruk mi in siseh, ramdang mi si chin chap holh thiam lo siseh, nihsawhnak le neknak hi a tam tuk tik ah mah le mah kan i zahpi ton. Cu tik ah sianghngakchia pawl hi sianginn ah cacawnnak lawng si loin, lenglei kan mui lei zong in harnak tam pi kan rak in tik ah caa kan cawn mi lawng si lo in, lenglei zeitin dah minih a kan hmuh ning in harsatnak tampi kan ing. Cu harsatnak nih mah le i thah duhnak, vawleicung ah nun duh ti lo nak, depression zong a chuah pi ton.  Sianginn kan vaa len hna ah hin, a kan chawnbiak dan hi a normal tuk. Zei bangtuk harsatnak dah an in ti mi zong khi hngalh khawh a si lo. Bia kan ruah hna ah khin a dam tuk mi le a thawng tuk mi cio khi an lo hna. An thinglung inn kaa aa on kho lo. Cu tik ah, Sianginn cacawnnak a dih in zaanlei ah biakinn ah CAFE kan ngeih hna i sianghngakchia pawl kha inivitation kan tuah hna. Aruang cu tuan ah ka chim cia bangtuk in, Sianginn ah Pathian kong chim a ngah lo tik ah biakinn ah invitation kan tuah hna i a phunphun in lente celh ti nak, tehteh khannak, biaruahnak, i hawikomhnak in le thlacam piak a duh mi hna caah thlacamnak kan ngei. Invitation kan tuah lio hna ah hin keimah ka ruahnak ah cun a hohmanh an rak chuak bal lai lo ti khi ka ruahchanh. Jesus kong an hngalh bal lo chinchap, biaknak kong an hngalh lo chinchap, ahohmanh an rak chuak men lai lo ka ti ko. Asianin Pathian nih kan mission kal nak ah a kan um pi. Sianginn ah kan ton mi hngakchia a tam bik cu CAFE mino i tonnak ah an rak ra dih ve hna. Azaan khatnak cu ahar pah, nomh duh le lente celh duh men lawng khin an ra hna. Anmah caah kan mah hi khuaruahhar minthang bangtuk khin a kan hmuh. Hmanthlak a kan sawm, cun kan holh lio zong hin an nii hna, bia hna an i ruah hna, innleng hi an chuak an lut thulh, kuak an va zuu ta. Bia i ruah tinak ding ah khin a har.

46151034_266555094060265_5180492335850455040_n46176194_1816071531849202_8053899115563581440_n45816380_560981330998845_5894805900379553792_n

Azaan hnih nak cu Tehteh khannak in, kan kong lam, kan tuanbia, music le drama kan piah piak hna i Pathian nih mitam pi cung ah rian a tuan, mino tam deuh cu an thinglung inn kaa an on. Adonghnak zaan cu mitthli he a tap mi an um, micheu nih Jesus Khrih an cohlang, micheu nih an harnak le an ngeihchiatnak, ka thawngtuk ka nunnak ah zeihmanh a cang lo a timi hna zong nih an thinglung innka an on i an tuanbia a kan chimh i mitthli he an tap hna. Cu harnak an in mi cu, chungkhar leiin, hawikom leiin, sianginn leiin, mah le mah i cohlang khawh lo nak, mah le mah tlamtling lo nak lawngte kha a si.

Zeitindah kan bawmh hna lai

Kum 12 in kum 17 mino pawl hi an thang lio a si tik ah harnak tampi an ing. Cu tik ah chungkhar, hawikom nih kilven a herh tuk. Lenglei in aa nuam tuk mi le, a hnangam tuk mi an lo nain chunglei in zawtnak tampi an rak ing ve. Cu harnak cu an kilven khawh lo tik ah vawlei nomhnak in Zu, kuak, ritnak a phunphun an tuah. Hi bangtuk thil an tuah tik ah kan sik hna, anmah lei an sining kha zeibangtuk harnak dah chunglei in an rak ing mi kha theihthiam piak hna lo in le hal hmasa hna lo in kan mah hmuh ning rumro in kan sik hna tik ah, an chunglei zawtnak kha a zual ter chin i an hnangamnak kawl duh ah vawlei pumsa nomhnak ah caan an hman. Hi bangtuk thil an ton ah hin, an chimmi bia kha a NGAI tu kan si a herh. Cu caah family asi mi nu le pa, u le nau, hawi le kom nih kan hmuhthiam ding ah a herh ngai mi cu, kanmah chan lio kan tuanbia in le kan ton mi in ttahchunh piak hna hlah usih. Anmah le an ton mi tu in hmuhthiam le chawnbiak tu thiam hna deuh hna usih. Na ton mi harsatnak le na fanu na fapa a tonmi harsatnak kha a lo loh. I lo pah hmanhseh law, kan inn tuarnak kha aadang. An sin ah neihniam in kan um i, an chimmi kha theihthiam piak le, anmah he i hawikomh kha a biapi tuk. Avoikhat nak a voihnih nak cu a har zungzal lai, biaruah zong hmanh ah nangmah tein bia aa ruahmi na lo ko lai, asinain na fanu na fapa ttha seh ti na duh asi ah cun, sik lo in an pawngkam te ah Dawtnak in na dawtnak kha langhter.

Tutan mission trip kan kal nak ah hin, keimah hrim nih mithmuh kuttongh in ka va ton ve tik ah keimah sianginn ka rak kai lio tampi ka theih. Mino hna nih an ton mi tete, an ngeihchiatnak, an lungretheih nak, nu le pa, u le nau nih kan theihthiam lo nak hna tete an mah pumpak in an chim cio tik ah keimah zong an mah kum ka rak si lio i ka inntuarnak kha ka theih ve. Tu lio laimi mino tete siseh, a thang lio mi kan nau le zong hi hi bangtuk inntuarnak a ngei mi tampi an um ve. Cu caah nang le kei nih mission rian pakhat kan tuan khawh ve nak cu, na u nau, na hawikom hi bangtuk lungretheihnak angeih mi an um a si ah cun, nang zong hi bangtuk hin mission rian pakhat rak thawk ve. An bawngte ah a theihthiam tu le an bia a ngeih piak tu na si i, an chimmi ah thaazaang a petu le a dirhkamh tu a bawm tu na si ah cun mino a thang lio mi kan nau hna caah hin santlaihnak tampi a chuak lai tiah ka hmuh.

Laimi le Khrih cu ai theng kho lo mi kan si bangtuk in, hi bangtuk mino tete a inntuar mi hna caah ah hin biakinn hi innkaa tampi in kan on a hau i, mino tete hna caah ah hin activitet / lentecelh ti nak, hlasak ti nak, bibel relti nak, a phunphun in rian kan ngei ve. Zeiruang ah mino tampi biakinn an rat duh lo nak aruang cu, tuah peng mi kan tuah tik ah kan tuah ding mi kha kan hngalh cang i, anuam lai lo timi kha kan hngalh cang. Cu tik ah lenglei lein kan ngeihchiatnak le kan inntuarnak kha biakinn ah kan rat pi ngam lo aruang cu nihsawhnak, capo nak a tam tuk. Curuang ah anmah le kum ning tein an ti khawh thawk in an tuah mi ah khan le, an ti khawh tawk in an i zuamnak ah thaazaang a petu si hram hna usih.

Matthai 28: 19 – 20

19Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u law, * 20kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai,” tiah a ti hna.

46072431_2190143167926337_6888485105870831616_n46226460_2114047308645980_6112217707543789568_n.jpg

A reltu dihlak nan cung ah ka lawm tuk! Bawipa nih thlachuah nak in pe ko hna seh.